Oberndorfer Reime von Karl Schemmerich

Der Wasserturm

 

Ja was een manchmal dümmes passiert,

wie man sein besten Freund verliert,

I möchte, i muß wahrhafti sog,

Und wißt`r, wer die ganze Gschicht

Hat mir, mein Spezl agricht?

Die Politik und dar neu Most

Könne mei Beste Freundschaft kost

Bei eener Kompanie Soldaten

Warn seit der Zeit mir Kameraden.

 

Von Oberndorf is ja nit weit

Nach Schweifert. Drüm von Zeit zu Zeit

Sen da un dort mir zamakumma.

Letzt hat er mi mal mitgenumma

Nei so a Gäßla, aus´n Haus

Da hengt a Fichtawedel raus.

Wo so a büschel außihengt,

Erklärt er,da wird Most verschenkt

Erst hob i nur a wenig geleckt

Kannst sünst nit so recht fort mits Maul

Bin als a wenig gedankenfaul,

Örscht hob i weiter gor nix gspürt,

När s Maul is ganga grod wie gschmiert.

Beim zwättn Glos ho i mein Michl

Aweng mit Politik wöll stichl,

Mir Oberndorfer, Blitz un Storm

Mir ham halt jetzt an Wassertorm,

Mei Lieber, äß dö net so gschwindst

Im ganzn Land an sottn findst

Denn wäßta 45 Meter

So hoch is fei no lang net jeder

Ihr Schweiferter dörft euch daneben

Mit eure Drackstörmli wos scham.

Auch im Verhältnis zu dann – is

Racht klee un lumpet der Johannis

Un des Salvaterle, o mei

Dos geht in unnern zwämol nei,

Un deß der Turm a net verbrönnt,

Is ganzagor ar vo Zement.

Un nacha, wart amol, von – von

Jawohl von Eisen un Beton.

Dar wird wohl nit so glei eifalln

Wie euer Ludwigschul-Turnhalln.

Bis naufs Basseng do konnste schnauf,

Gehen 120 Stufen nauf.

Un nacher geht’s auf era Leiter

Bis naufn Helm a schös Stück weiter.

Un eine Aussicht hosta da,

Wäß Gott, bis nach Amerika.

Un weiter wist, da siehst bereits

Wenn´s racht schö hall is, gor die Schweiz.

An Kreuzberg und die ganza Rhö,

Dia liegn da sou wunderschö.

Un Oberndorf, des harzig Nastla,

Liegt drin a grod, wia in a Kastla

He, jetz dia Hend voull Häuser da,

Die wu da untn liegn ganz nah,

Wahrhafti ja, es bleibt dabei,

dos Drackheft, des muß Schweifert sei.

Künnt wieder amol dar Zeppelin

Har mit sein Luftschiff vo Berlin,

Na braucht ar si auf gor keen Fall

Sou zu verirrn wie salbiges Mal.

Denn wie im Meer durch Klipp un Riff

Der Leuchtturm zeigt en Weg vom Schiff.

So führt jetz durch die Luft dahin

Der Wasserturm an Zeppelin

Herrjesses, wos der Mensch oricht,

jetz ho i gor a no gadicht.

Ja un zun Dank na für dan Gfalln

Spendiert ar uns a Luftschiffhalln.

Na höm die Dittelbrünner Knochn

Mir Oberndorfer dou ro gstochn.

Un wennst da siehst, sog schöna Grüß,

Mit ihra Luftschiffhalln is nies.

Ihr sogt un meent, es söllt uns wurm

Der Oberndorfer Schuldetorm.

Un stackert ar bis obn nauf voll,

Wöllt ihr sche uns vielleicht bezohl?

Söllt ihr vielleicht amol nit wiß,

Wohi mit eure Überschüß,

Mir ham a winzigs Eckla frei,

Da genga se grod zwämal nei.

Mei Michela, dar hat geguckt,

Hat si gaärgert, geschpetzt un geschluckt,

Jetzt Platzt ar raus ganz wiederwärti:

Du Karla, bista denn jetz ferti?

Du plauderst ner in een Trum fort,

Dakümmt mr ja gornet zu Wort.

Steht auf un schmeißt sei Zehrgeld no,

Langt vo der Wend sei Kappen ro,

Ar nimmt en Drücker nei die Hend

Un schreit mi aa: Kreuzsapperament,

du hast ganz racht, dar Torm, dar trotzi,

Dar steht grod da wie ihr so protzi,

hat scharfa Kantn, un dicke Mauern,

Grod wie ihr Oberndorfer Bauern.

Halt, öppes möchte i nit vergaß,

In noch was tut er zu euch paß.

Der Torm is sou a hohler Troupf wie du

Un Wasser hat ar in sein Koupf a grod a sou.

Bums – krach, die Tür war zu.